Cojgoek Bouxyiuz dwg
gyoengq Goujleiz caeuq gyoengq Sammiuz ciuhnduj, dieggoek gyoengq Bouxyiuz dwg
doenghgij diegrangh baihgyang caeuq baihlaj Dahhenj caeuq doenghgij diegrangh
baihgyang caeuq baihlaj Dahraez, doenghgij diegrangh baihgyang caeuq baihgwnz
Dahvaizhoz. Daengx seiqgyaiq miz Bouxyiuz 320 lai fanh vunz, gyoengq Bouxyiuz
youq Cungguek baen youq Guengjsae, Huznanz, Yinznanz, Guengjdoeng, Gveiqcouh,
Gyanghsih daengj sengj roxnaeuz dieggaggaem 134 aen yienh, siq; goj baen youq
Miengzgeu, Miengzlaux, Miengzdaez, Menjdenq, Meijgoz, Gyahnazdah, Miengzfap daengj
guekgya. Bouxyiuz gag miz 28 cungj heuhfap bonjfaenh, caemhcaiq miz 450 cungj
heuhfap vunzrog heuh de. Bouxyiuz cujyauq baen guh Mienh, Bohnox, Laeggyaj sam
cungj, daih dingzlai Bouxyiuz nyinhnaeuz Buenzvuengz roxnaeuz Mehlozdoz dwg
goengcoj roxnaeuz mehcoj gyoengq Bouxyiuz. Bibi liggaeuq ndwencib cibloeg dwg
Ciet Buenzvuengz, ndwenngux ngeihcib gouj dwg ngoenzdoekfag Mehlozdoz Ciet Dajnungj.
Bouxyiuz gangj Vahmienh, vah Bohnox, vah Laeggyaj caeuq vahdeihfueng Vahgun,
Vahlaux, Vahgeu, Vah'ingh daengj lai cungj vah. Ciuhgeq Bouxyiuz miz mbouj miz
sawcih bonjfaenh, nanz gangj lai, siqgij gonq 80 nienzdaih aeu cihmeh lahdingh
daeuj guh cihmeh gyoepraiz caux ndaej Sawyiuz Vahmienh okdaeuj, doeklaeng
doenghboux daiqbyauj Bouxyiuz Cungguek, Meijgoz caeuq Miengzdaez sam guek neix
doxcaeuq doengjit liux Sawyiuz Vahmienh, Bouxyiuz vanzlij caux ndaej Sawyiuz Bohnox
dem. Bouxyiuz swenqciuh lailai, faenzhag caeuq faenzvaq caemh gyaeundei raixcaix.（译者：刘敬柳[勒丁布壮]） |
