勒丁布壮 贝侬已经在第一时间翻译好了壮文:
Loq Gangj Bouxyiuz:
Bouxyiuz ok gyoengq "Sammiuz" daeuj, dieggoek gyoengq Bouxyiuz youq gij diegrangh Dahhenj, gij diegrangh baihgyang caeuq baihlaj Dahraez, gij diegrangh baihgyang caeuq baihgwnz Dahvaizhoz daengj gij dieg baihbaek Huznanz neix. Daengx seiqgyaiq miz Bouxyiuz 320 lai fanh vunz, gyoengq Bouxyiuz youq guek raeuz baen youq Guengjsae, Huznanz, Yinznanz, Guengjdoeng, Gveiqcouh, Gyanghsih daengj sengj caeuq dieggaggaem 134 aen yienh, siq; youq guekrog baen youq Miengzgeu, Miengzlaux, Miengzdaez, Menjdenq, Meijgoz, Gyahnazdah, Miengzfap daeuj guekgya. Bouxyiuz gag miz 28 cungj heuhfap bonjfaenh, caemhcaiq miz 450 cungj heuhfap vunzrog heuh de. Bouxyiuz cujyauq baen guh Mienh, Buod nuox, Laeggyaj sam cungj, daih dingzlai Bouxyiuz nyinhnaeuz Buenzvuengz roxnaeuz Mehloegdoz dwg goengcoj roxnaeuz mehcoj gyoengq Bouxyiuz. Bibi liggaeuq ndwencib cibloeg dwg Ciet Buenzvuengz, ndwenngux ngeihcib gouj dwg ngoenzdoekfag Mehloegdoz Ciet Daznuj. Bouxyiuz gangj Vahmienh, vah Buod nuox, vah Laeggyaj caeuq vahdeihfueng Vahgun, Vahlaux, Vahgeu, Vah'ingh daengj lai cungj vah. Ciuhgeq Bouxyiuz miz mbouj miz sawcih bonjfaenh, nanz gangj lai, siqgij gonq 80 nienzdaih aeu cihmeh lahdingh daeuj guh cihmeh gyoepraiz caux ndaej Sawyiuz Vahmienh okdaeuj, doeklaeng doenghboux daiqbyauj Bouxyiuz Cungguek, Meijgoz caeuq Miengzdaez sam guek neix doxcaeuq doengjit liux Sawyiuz Vahmienh, Bouxyiuz vanzlij caux ndaej Sawyiuz Buod nuox dem. Bouxyiuz swenqciuh lailai, faenzhag caeuq faenzvaq caemh gyaeundei raixcaix. |